Sri Lakshmi Narasimha Darshana Stotram
rudra uvāca |
atha dēvagaṇāḥ sarvē r̥ṣayaśca tapōdhanāḥ |
brahmarudrau puraskr̥tya śanaiḥ stōtuṁ samāyayuḥ || 1 ||
tē prasādayituṁ bhītā jvalantaṁ sarvatōmukham |
mātaraṁ jagatāṁ dhātrīṁ cintayāmāsurīśvarīm || 2 ||
hiraṇyavarṇāṁ hariṇīṁ sarvōpadravanāśinīm |
viṣṇōrnityānavadyāṅgīṁ dhyātvā nārāyaṇapriyām || 3 ||
dēvīsūktaṁ japairbhaktyā namaścakruḥ sanātanīm |
taiścintyamānā sā dēvī tatraivāvirabhūttadā || 4 ||
caturbhujā viśālākṣī sarvābharaṇabhūṣitā |
dukūlavastrasaṁvītā divyamālyānulēpanā || 5 ||
tāṁ dr̥ṣṭvā dēvadēvasya priyāṁ sarvē divaukasaḥ |
ūcuḥ prāñjalayō dēvi prasannaṁ kuru tē priyam || 6 ||
trailōkyasyābhayaṁ svāmī yathā dadyāttathā kuru |
ityuktā sahasādēvī taṁ prapadya janārdanam || 7 ||
praṇipatya namaskr̥tya sā prasīdētyuvāca tam |
tāṁ dr̥ṣṭvā mahiṣīṁ svasyapriyāṁ sarvēśvarō hariḥ || 8 ||
rakṣaḥ śarīrajaṁ krōdhaṁ sarvaṁ tatyāja vatsalaḥ |
aṅkēnādāya tāṁ dēvīṁ samāśliṣya dayānidhiḥ || 9 ||
kr̥pāsudhārdradr̥ṣṭyā vai niraikṣata surān hariḥ |
tatō jaya jayētyuccaiḥ stuvatāṁ namatāṁ tathā || 10 ||
taddayādr̥ṣṭidr̥ṣṭānāṁ sānandaḥ sambhramō:’bhavat |
tatō dēvagaṇāḥ sarvē harṣanirbharamānasāḥ || 11 ||
ūcuḥ prāñjalayō dēvaṁ namaskr̥tvā nr̥kēsarim |
draṣṭumatyadbhutaṁ tējō na śaktāḥ sma jagatpatē || 12 ||
atyadbhutamidaṁ rūpaṁ bahu bāhupadānvitam |
jagattrayasamākrāntaṁ tējastīkṣṇataraṁ tava || 13 ||
draṣṭuṁ sthātuṁ na śaktāḥ sma sarva ēva divaukasaḥ |
ityarthitastairvibudhaistējastadatibhīṣaṇam || 14 ||
upasaṁhr̥tya dēvēśō babhūva sukhadarśanaḥ |
śaratkālēndusaṅkāśaḥ puṇḍarīka nibhēkṣaṇaḥ || 15 ||
sudhāmaya saṭāpuñja vidyutkōṭinibhaḥ śubhaḥ |
nānāratnamayairdivyaiḥ kēyūraiḥ kaṭakānvitaiḥ || 16 ||
bāhubhiḥ kalpavr̥kṣasya phalayugviṭapairiva |
caturbhiḥ kōmalairdivyairanvitaḥ paramēśvaraḥ || 17 ||
japākusumasaṅkāśaiḥ śōbhitaḥ karapallavaiḥ |
gr̥hīta śaṅkhacakrābhyāṁ udbāhubhyāṁ virājitaḥ || 18 ||
varadā:’bhayahastābhyāṁ itarābhyāṁ nr̥kēsarī |
śrīvatsakaustubhōraskō vanamālā vibhūṣitaḥ || 19 ||
udyaddinakarābhābhyāṁ kuṇḍalābhyāṁ virājitaḥ |
hāranūpurakēyūra bhūṣaṇādyairalaṅkr̥taḥ || 20 ||
savyāṅkasthaśriyā yuktō rājatē narakēsarī |
lakṣmīnr̥siṁhaṁ taṁ dr̥ṣṭvā dēvatāśca maharṣayaḥ || 21 ||
ānandāśrujalaiḥ siktāḥ harṣanirbharacētasaḥ |
ānandasindhumagnāstē namaścakrurnirantaram || 22 ||
arcayāmāsurātmēśaṁ divyapuṣpānulēpanaiḥ |
ratnakumbhaiḥ sudhāpūrṇairabhiṣicya sanātanam || 23 ||
vastrairābharaṇairgandhaiḥ puṣpairdhūpairmanōramaiḥ |
dīpairnivēdanairdivyairarcayitvā nr̥kēsarim || 24 ||
tuṣṭuvuḥ stutibhirdivyairnamaścakrurmuhurmahuḥ |
tataḥ prasannō lakṣmīśastēṣāmiṣṭānvarān dadau || 25 ||
iti śrīpadmapurāṇē uttarakhaṇḍē aṣṭatriṁśadadhikaśatatamō:’dhyāyē śrī lakṣmīnarasiṁha darśana stōtram |
